fyr 30 Joor ohni Bschiss
Im Spootsummer pilgere mir in d’Stadt
Ganz in wyss, mir finde die Idee sauglatt
Denn schliessligg laadet Pro Innestadt yy
Zem White Dinner, vom Märtplatz bis yber dr Rhy
Ghuum hänn die g’ruefe zu dem „Iwent“
Sin mir belaade uff die mittleri Brugg denn g‘rennt
Mitem Piggnigg-Koorb voll Frässalie unterem Arm
So soll das si amene Oobe mit bsunderem Charme
Do ghasch mit Friinde uff dr Stroos diniere
Weder Auto, no Tram ghenne uns geniere
Und gitt’s derzue no e Gleesli Wyy
Denn sin mir Jubilaare gärn derbi
Prächtig verstande hänn sich au und schittle sich d’Händ
Die beide doofe Ganove vo de greeschte Fussballverbänd
Speeter werde e paar Bätzeli vo Ziiri nach Nyon verschobe
Ätsch, liebe Sepp, so eppis mergge halt d’Schwoobe
Doch denn ghunnt uss, oh Rieseschregge
Au dr Kaiser Franz sell unter dr gliiche Deggi stegge
Und just in däm Moment, wo sich alli d’Hoor dien raufe
Beruhigt uns dr Sepp: „E WM ghamme nid kaufe!“
In Lieschtel blitzt Sibel ab wege Schulde
Mitem Sitzigsgäld im Nationalroot füllt sie jetz Mulde
In allne Keebab-Buude eene am Rhy gseht me das gärn:
„Glai-Bassssel e eigeni Stimm hett jetz in Bärn!
„Bini öppe e Kiosk, oder bini e Bank“,
Du machsch mi „giggerigg“ (mängisch au krank)
„Alperoose“, d‘“Rosemarie und i“ ächt no es Paar?
Dr Polo jetz Schwiizer des Jahres:
Im „Summer 68“ no undenggbar!
Derfyr isch d’Gitaare vom Hotel California verstummt
Au bim Lemmy und Bowie wird dehaime nimmi gsummt
Nur dr scheeni Silvio Berlusconi
Dä will dr Liebgott im Himmel nooni
Dr Roger K. hett ums Verregge nach Bärn welle
D’Ziircher Wähler dien ihm dä Gfalle, die gsteerte Gselle
Im Bundeshuus aagho, mitem „Läpi“ uffem Schoos
Zeigt er glii: „Eier Gschwätz intressiert mi nid gross!“
Zrugg in Stiefel oder d‘Heimet, no Amerika oder zu Arsenal
Unseri FCB-Stars haue ab in alli Richtige mit Yberschall
Und macht wytter s’Training dr Marco W.
Wirdsch glii no eine vo uns im Joggeli schutte gseh!
E naggti Tatsach isch er jo zwar nid
Dä Pappa Joe’s Spezial Banana-Split
Aber hesch ein fyr’ne humorlosi Grytte vo Chefin bstellt
Wirsch am näggschte Daag grad vor d’Tiire gstellt
So, Ihr Liebe, jedes Fescht isch emol Gschicht
Mir mien jetz go, mir mache jetz dicht
Mir hoffe, dass bis zem nägschte Mool alles besser ghunnt
Und wiensche Eich e gueti Zyt und bliibet xund
Eiri
Gassebrieder
Pssst, jooo, Du: Stimm doch bitte fyr unsere Waage!
Schigg e SMS mit
und gwinn selber e Goldvreneli. Merci und viel Gliegg!!!“