s’ vierzygschte Joor
wird Ueli-Bier serviert
Vor 40 Joor im Dschungel vo Kinshasa in Zaire
Boxt dr George erfolglos uff dr Ali ii wie’ne wilds Tier
D’Fischerstube isch syt Johre gschlosse
Bier isch deerte scho lang keins meh gflosse
Dr Hans-Jakob Nidecker hett’sie denn yybernoh
Wyl aber uff ghai Fall s’Angger vo Frenggedorf uuseloh
Holt sich e Braumeischter statt no lang z‘schmoore
So wird’s ’Ueli Bier im 74 geboore!
„Sie schutte’s scheen, sie schutte’s toll“
Singt au vor 40 Joor d’Standpauke wundervoll
Gege Brasilie schutte sie’s digg, do gitt’s nytt z’kääre
Wenn’s nur nid scho wieder die Schwoobe wäre.
Z’Bärn im Bundeshuus, wie fascht allewyl
Passiert verdeggel nid speziell viel:
Dr Alain, de mit Nochname Berset
Kasch mit viel Gligg emol im TV gseh
Fyr d‘OSZE diest dr Didier duur die halb Weltgschicht
Und kunnt er z’Basel verbi, mache sie d‘Stadt grad dicht
D’Eveline meldet: „2 Milliarde sin eifach nym umme“
Das losst au die greeschti Ziiri-Schnuure loh verstumme
Dr Ueli baschtlet au ohni Gripen, juhee
Im stille Ghämmerli an dr beschte Armee
Simonetta
Ärger macht dr Johann
Und Doris längt bimene Satire-Tweet derneebe
D’Poscht goht ab in Zug: Mit e paar Liter Kirsch in dr Biire
Dien sich d’Jolle und dr Landamme ins Separee veriire
D‘Gschicht vo K.O.Tropfe findet s’Ghäsblatt us Ziiri ganz toll
Schon sin wieder e paar Sytte mit Unwichtigem voll
Wo dr Thiel bim Schawinski sini Uffwartig macht
Hett’s die ganzi Sendig duure mächtig kracht
Mit de Nerve vom Vorstand hett au dr Vero g‘flipperet
Jetz hänn sie ihn doch no vo GC zum CC verskibberet
Bim FCB gitt’s nyt me yber dr Muri z’flueche
Dr Paolo isch nimmi am neui Uffstellige sueche
Derfyr hett dr EHC miesse d’Seggel striiche
Drum heere mir jetz glaub uff und dien do schliesse
Bevor no epper wegem Zeedel duet Orange zruggschiesse
Mir hoffe, dass bis zem nägschte Mool alles besser ghunnt
Und wiensche Eich e gueti Zyt und bliibet xund
Eiri
Gassebrieder
Pssst, jooo, Du: Stimm doch bitte fyr unsere Waage!
Schigg e SMS mit
und gwinn selber e Goldvreneli. Merci und viel Gliegg!!!“