… au mit 70 Lenze uffem Buggel isch ihm no ganz wool
Drum fyyre mir dä jungbliibeni Jubilaar:
Unsere eerschte Basler Fuessballstaar!
Wiesset Ihr no, wie’n er het ghenne d’Bäll verteile?
Dr Rämsi gschiggt uff d‘Reis, miteme steile?
Uff dr Kopf vom Balmer oder Hauser, pfannefertig serviert?
In d’Fiess vom „Äffli“ Wenger, Diagonalpäss adressiert?
Und het ihn dr Schiri Scheurer als putzehässig gmacht
Hänn mir uns scho ins Fiestli glacht:
Denn ghaini fienf Minute speeter, mit dr Wuet im Ranze
Zapplet dr Ball im Griez, und d’Puppe tanze!
Doch während mir mit em Kaarli gärn jubiliere
Ghentsch andere Lyt als glatt eins schmiere
Oder hänn - wie dr Felix B. uss Eestrich - e Riesegnall
Und fliege mit em Fallschirm quer durch’s All!
Dr Christoph B. isch nym immun syt em Summer
Doch wyl nit goht, bereitet ihm das au ghai Ghummer
E andere SVP-Christoph het mit dr Uni Ziiri so sini Sörgeli
Als fuule Hund wird er gschiggt no vor em Zmörgeli
Dr Abzogger Daniel V. verzichtet freiwillig uff wytteri Boni
Wie’n er als Räntner sie sell verglepfe, das weiss er noni
Dr Walliser Oberschugger Christian V. isch im Verdacht
In dr Tierkei e paar Stai g’fulze z’ha iiber Nacht
D’UBS wird im Stunde-Taggt verglaggt
Und vo de Amis wäg jedem Bleedsinn g‘jaggt
Insieme wird gstoppt, Millione vo Frangge sin verreggt
Und niemmer weiss, wer hinter dem Desaschter steggt.
Dr FCB verschiicht sini Veegel als no vor em Winter
Und selbst Spieler wie dr Alex F. fliege dicht derhinter
Findsch bi dr Schi-Nati nur no bim Ussrede sueche und Bleite erglääre
E soone Tempo wie bi de wirbelnde FCB-Funggtionäre
D’Camilla P. gha sich no so sehr ufftaggle
Dr Charly isch gärn wieder ellei bim mit de Ohre gwaggle
Si Sohn, dr Harry, verduftet lieber zu de Afghane
Als endligg e Affääre mit „Her Royal Hotness“ aaz’bahne
D’SBB wäxlet ganz unverhofft ihr Billie-System
S’Reesli findet’s jetz no weniger bequem
Mit flingge Finger holsch am Barfi BVB-Informatione
Dangg dääne Siehle sell sich s’Warte jetz sogar lohne
Doch mier wänn jetz nymmi länger warte
Mien pinggtligg mit unserem Waage starte
Und gniesse die scheenschte 3 Dääg
Mir wiensche Eich viel Spass und bliibet zwäg
Eiri Gassebrieder