oder
Uns isch die Titanwurz iiberhaupt nid Schnurz!
Bis letschte Friehlig hämmer warte miesse
Bis die Bliete vo dr Titanwurz ändligg duet spriesse
D’Gärtner richte scho glii e Webcam druff
Am PC juble mr denn: Jetz goht sie grad uff
Au mir springe schnell in Botanische Garte
Vor lutter Gwunder kenne mrs kuum erwarte
Bim Bewundere vo dr Bliete isch ys aber nid ainerlei
In dem Ruum stinggt‘s schlimmer wie im Haafebeggi 2
Basel stinggt anders(cht), hett’s pletzligg gheisse
Mir saage do nur, die hänn doch glatt e Meise
Aber Basel verdanggt däm Titanwurz-Duft so näbebi
Dass nid nur gredet wird iber dr Gschtangg vo dr Chemie
Obwohl’s griislig fischelet kemme d’Lyt Tag und Nacht
Alt und Jung ergötze sich an dääre Riesepracht
E paar Daag nur, scho lambt dr Kopf nach aabe
Dr Titanwurz-Spuk isch verbi, dr Slogan kasch begraabe
Vo Politiker, wo’s stinggt, wämmer no e weeneli schriebe
Und vo Lyt, wo sich d’Zyt „anderscht“ dien vertriebe
Vor de Wahle 2011 hett’s aafo stingge bi dr SVP
Dr Zuppiger z’portiere findet d’Weltwuche kai gueti Idee
Drumm schigge sie kurzspitz dr Buure-Preesi ins Renne
Zämme miteme Welsche, wo kaine duet kenne
So isch‘s anderscht uusekoo als gwünscht in Bärn
Uff aimol hänn sich alli andere schüüli gärn
D‘Frau Widmer-Schlumpf muess ihre Sessel nid ruume
Fiirchterlich blocherets a dem Mörgeli ussem Egge vo dääne SVP-Pfluume.
In Herrlibärg kunnt em Christoph denn in Sinn
„Ah, jo, in minnere Mappe isch no e haisses Dossier drin
So kennt me die Evelyn uff Umwege destabilisiere
Jetz muess i nur no mi Friind Roger Köppel informiere“
D’Weltwuche zieht iiber dr Hiltebrand her ganz ungeniert
Ohni z‘hinterfrooge werde gstohleni Banggdaate publiziert
Und wo sich dr Köppel iimischt, ghunnt’s zum Knall
Em Hiltebrand fangt’s aa stingge, er ghunnt zu Fall
Im Ditsche gfallt’s im Wulff im Amt trotz Gegewind
Doch denne koschdet’s au ihm dangg „Bild“ dr Grind
„Es stinggt mir zwar, doch soll er biesse fyr siini Sünde“
Losst d’Angela zwische zwai Nicolas-Dates verkünde.
Au privat fangt’s bi gwisse VIP anderscht aa stingge
D’Melanie will kai Stress mee und klopft d’Fingge
S’Francine schwingt sich ussem Sattel uffe Florian si Ascht
Dr Grosshans uss Tschetschenie landet gar im Knascht.
Vo dr Hochzyt in Ängland kasch tuusigi vo Bilder finde
S’Paar vo vorne, d’Pippa vorzugswiis vo hinde
Im Dschungelcamp stinggt dr Raven vor sich aane
Dr Ailton schwingt wege dr blutte Micaela die wyssi Fahne
Im Fuessball duet’s em Fink bim FCB uff aimol stingge
Dr Dinosaurier vo dr Bundesliga duet uffgreggt wingge
Mir vertraue em Heiko, dreie gege ManU total duure
Au ohni dass uns dr „Blick“ kaa dr Muri uffschnuure
Anderscht stingge hin oder her, mir wänn nym liire
Und bi de scheenschte drei Dääg go mitfiire
Mir hoffe, es lauft Eich allne allewyl rund
Wiensche Eich e gueti Zyt und bliibet xund
Eiri Gassebrieder