Amene Samschtig düüse mir ins Casino uuse
Do iberkunnt ys doch s’naggte Gruuse
Rauch stiegt uss de Kiehlhieser vo deert ähne
Uns brennt’s in de Auge, es fliesse gar Drääne
Denn s’Fleisch vom Bell wird statt aabeghiehlt
Mit Hochdrugg vorzue grad grilliert
Au Pizzas und anderi Tiefkiehlproduggt
Gehn in de Flamme futsch - es isch verruggt!
Die arme Fiirwehr-Lyt, bewaffnet mit Schluuch,
Stehn sich iber 2 Wuche d’Fiess in Buuch!
Denn, ändligg, isch wieder alles paletti,
Dr Brand goht als längschte in d’Basler Gschicht ii!
Wo Lyt nid hänn miesse Fiir und Rauch vertriebe
Vo deene wämmer do no e weeneli schriebe
Im Ditsche brennts vo Leerrach bis Schwerin
Tschuld isch e Buech vom Herr Sarrazin
Und als Sahnehäubchen, mir deerfe’s verzelle
Stolperet dr Kriegsminischter no iber fehlendi Quelle
Dr Silvio, mit Name Berlusconi
Cha ahnschienend nid ganz si ohni
E sone Dame in zartem Alter wie d Ludmilla
Und Bunga-Bunga innere schigge Villa
Uff dr andere Sitte vom Mittelmeer
Do händs die Diggtatoore jetz ganz schwer
Dr Tunesier Ali wie au immer
Verduffte pletzligg, kein hett e Schimmer
Dr Muuh-Baragg hett s Witti gsuecht … und gfunde
Irgendneime bi de andere Arabies unde
Und z Lybie sufft dr Herr Ghaddaffi
Immene Bungger jetz si Morgekaffi
Dr Obama gitt denn ussem Weschte
No paar gueti Tipps zem Beschte
Gha viel Geld, wo d Amis deene Unberechebaare
In Hinter gstopft hett, jetze spaare
Dr beriehmti Refrain vomene Basler Schnitzelbangg
Macht unseri Ski-Nationalmannschaft ganz grangg
Denn die Cracks ghenne nur „Ynesteche, ummeschloh …“
Und lehn die andere denn loh „…duurezieh und aabeloh“
Au d WM vo de Tschütteler isch nid famos
Nach em Sieg gege Spanie isch nimmi viel los
Doch uff Malta dien sie nomol alles toppe
Und im Doppelpack vom Elfer floppe
Do freuie mir uns z‘Basel halt am FCB
Dä hett letscht Friehlig d‘Young Boys eifach yberseh
YB und Titel, do schreie mir grad im Chor
Au die brenne scho syt 25 Johr!
So, mir wänn jetz nimmi wytter lamentiere
Und uns uff die scheenschte 3 Dääg konzentriere
Mir hoffe, es lauft Eich allne allewyl rund
Wiensche Eich e gueti Zyt und bliibet xund
Euri Gassebrieder