Mr tippe www.streetview.ch yy, scho sause mr los,
Vom Wettstaiplatz gradewägg in d'Feldbergstroos.
E Klick, scho mache mr e Gump uff s'Heuwoog Viaduggt,
Faare duur dr Baustelle-Tunnel, es isch verruggt.
Duesch di Bligg nid nur uff d'Stroose richte,
Entdeggsch in deere virtuelle Welt e Huffe Gschichte:
Denn yberall, wo mir e weneli dien verwyyle,
Beobachte mir Sache zem Giigele und Hyyle
Do stoot am Flughaafe usse e spezielle Diise-Jet,
Baraad fir dr Merz, wo gern Gaissle in Lybie abhoole wett!
Doch dr General Ghadaffi findet das nur e schlechte Witz
Und schiggt unsere Bundespreesi wiider haim wie dr Blitz.
Vor em Spital wetzt schnell dr Roger Federer verbi
Und hett statt Rackets grad 2 Baby-Björn derbi!
Mir stuune, wie d'Mirka und dr Roger hänn kenne vermiede,
Dass d'Zytige scho vor dr Doppelgeburt Bleedsinn schriibe.
Bim Baimli kunnt grad dr Carl Hirschmaa z'husche,
Jo, dä wo hett welle beesi Sache vertusche!
Denn, so bemängle e paar vo sinne Gritte,
Gäb's statt heissi Liebi nur uff d'Schnitte.
Apropos: Do faare mr bimene Scheenheitschirurg duure
Und gseen dr Berlusconi mitere schreege Schnuure!
Vermutlig hett eine nach em Silvio sinere Schäferstund,
Z'lang miesse warte vor dr Diir, als näggschte Kund.
Mr giggele duur e Fenschter im Rotliechtrevier,
Do gilleret doch faggtisch dr "Schniedel-Woods" e Bier!
Uff sim Schooss losst er lyycht glaideti Dame danze,
Mit sim Schleeger 7 bikunnt er dehaim derfir uff dr Ranze!
Am Banggeblatz gitt's bi dr UBS e glaini Demonstration,
Gwiss wänn die Bängger statt Bonus mee Lohn!
Näbezue bi dr CS winggt e Fritz mitere Date-Diskette
Und dräumt scho vonere Schwoobe-Prämie, ere ganz fette
!
Bim Glooschterbäärg isch grad e Fescht.
Zmittsdrinn 2 Brasilianer vom FCB als Gäscht!
Mir finde: So lang Streller und Frei ihri Goal dien schiesse,
Kenne die zwei Gleen ruehig no ein hinter d'Binse giesse!
Mir mien scho saage:
Uns duet das Street View dermasse imponiere,
Dass mir fir dr Cortège grad au e Kamera mien installiere.
So kenne mir nach de scheenschte 3 Dääg,
mit viel intrigiere,
dr aigeni Gweerschnitt uff unserer Homepage präsentiere.
Mir hoffe, es lauft Eich an deere Fasnacht rund
Und wiensche allne e gueti Zyt und bliibet xund.
Eiri Gassebrieder