An dr EM z'Basel, fyr eimool isch es gar heiss,
Lauft ys trotz kurze Hose in Bächli dr Schweiss.
Doch hämmer ys gfreit wie glaini Buebe,
Dass s'Oranje-Team au bi uns muess ko iineluege.
Vo Bärn häär oder au direggt vo Noorde,
Isch si uff Basel gschtreemt, die Holländer-Hoorde.
Uffem Märtplatz baade e paar im Brunne,
Bim Barfi wird lutt und ziemligg falsch gsunge.
Uff dr Fernseh-Biehni bim Kaffi Spitz
Oder unde draa, uff de quer montierte Sitz,
Yberall in deere Stadt, me ka's kuum glaube,
Hesch e orangi Wand vor Auge.
Und wo sich die ganzi Meuti so gege Oobe
Vo dr Kaserne Richtig Stadion hett verschoobe,
Stosch do, stuunsch und frogsch di ohni Seich:
"Es isch doch nid eppe scho Morgestraich?"
Mir gniesse de Daag und wäre gern wieder derbi:
Binere näggschte Oranje-Manie z?Basel am Rhy.
Leider isch wie bi de Oranje nach em EM-Out,
Au bi uns im Land d?Stimmig zur Zyt versaut:
Denn nid orange sin d?Zahle vo dr UBS, sondern knallrot!
Und au wenn trotz Staatshilf dr Pleitegeier droht,
So gitt?s bim Zaaldaag immer no deerigi wo moniere:
?Unseri Booni deerfet ihr aber nid storniere!!!?
Die Bängger uffem hoche Ross hänn?s no nid begriffe,
Dass sie wie in Nussschale uff Welle dien ummeschiffe
Do hilft s?neii Motto ?Date fyr Staate? au nid wytter.
Im Gägeteil: Dangg dr EU blibbt?s wytterhin schitter.
Wege dr Finanzkrise erklärt dr Couchpin: ?Bref,
Jetz, wir kümmern uns nischt mehr um Mössiö Nef!?
Das freut dr Schmid: Er schliesst dr Laade,
Düüst nach Peking und gniesst d?Olympiade.
Zrugg vom Reisli merkt dr Sämi denne:
?I ka jo an kei Grossaalass meh renne!?
Gitt kurzentschlosse si Ruggtritt bekannt,
Scho keiffe si los im Ziircher Hinterland.
Blocher mit Maurer oder doch dr anderi Weg umme:
Bi deere Usswahl sin mir doch die Dumme!
Und damit dr Maurer schliessligg, de Sprücheklopfer,
Bundesroot wird, bruucht?s e Buureopfer.
Unseri SBB finde mir jo grundsätzligg toll
Doch gheersch, Pendler heege d?Schnauze voll
Steehn im Gang, ghenne nid sitze und no e chlei penne
Und sotte fyr das kienftig au no mehr brenne!
Wetsch trotz Krise digg verdiene und am Strand ummeligge,
Ganz ohni Gritte, deere muesch nur SMS schigge.
Gniessisch d?Sunne, badisch im Meer statt schlittle.
Das alles ka dir dr Hakan Yakin und si Beroter vermittle.
Mir Gassebrieder hänn eigentligg nyt meh z?lache,
Denn mit unserem Waage deerfte mr nymmi mitmache.
Ghenne nach yber 20 Johr unfallfreiem Fasnachtstriibe,
Nägscht Johr unseri Nase blattdrugge - im Mutz an dr Schiibe.
Trotz deene Zukunftsperschpektive, deene düschtere
Dien mir eich jetz do aber flüschtere:
Das Johr werde mr's no richtig gniesse
Und vo däm Waage do oobe-n-abe schiesse.
Mir hoffe, es lauft eich an de scheenschte 3 Daag rund
Und wiensche'nich e gueti Zyt und bliibet xund.
Eiri Gassebrieder
Do no e ?Werbeblogg? soz?sage in eigener Regie:
Unseri Zeedel sin gsponseret vom Berger Karlii
Dr Drugg verdangge mir emmene Oberbaselbieter
Es isch e Schwiizer und zwar dr Dieter