Gosch z'Basel in d'Schuel, muesch nym lang studiere,
Mit was fyr Glaider di wieder willsch präsentiere.
E Griff in Schrangg, in d'Uniform gschloffe,
Bisch scho parat, di Daag isch gloffe.
Wenn di duesch uniformiere
Kennisch schient's besser studiere!
Doch jetz, herjee, hämmer grad ganz aggtuell,
Miesse gheere, es sigg doch nid so sensationell!
Die Ghinder hänn g'jommeret: "D'Hose isch z'lugg
Und dr Pulli hebt nid Stand gege dr Kälte-Drugg!"
Dangg däm "Fiidbägg" gitt's jetz neii Norme
Und speeter viellicht doch wieder Uniforme ...
Z'Bärn sait dr "Schossef" tschüss, e Dame muess aane.
Doris L. gitt denn emol s'Okay, me gha glii aafo plaane
Und fyr d'Wahl e ginschtige Termin ussjasse,
Damit die Frau uff ghai Fall Schwiiz-Franggriich duet verpasse!
Mir dien lieber z'Basel uniformiere
Als uff Bern uufe go debattiere.
Das WM-Joor isch fyr unsere FCB kai Sääge:
Sie verliere dr Titel, s'Gsicht und Spieler wie dr Dääge.
E paar Vollidiote mache am 13. Mai alles no schlimmer.
Wenn schiggt me die Type ändligg in d'Wieschti, und zwar fyr immer?
Au die in Uniform hänn Schleeg ghassiert
Und leider nid ghenne verhindere, was isch passiert!
Dr Armstrong heert uff, bevor meh au ihn gha schnappe.
Fyr epper andersch soll's jetz mit em Tour-de-France-Sieg klappe.
Spannend wird's: Denn dr Eini oder Anderi floppt
Und am Schluss hegg dr Sieger denn doch no doppt!
Trotz Phonak-Radler-Uniform
Verhaltet sich dr Floyd nid gschäftskonform
Ins Fettnäpfli drammt dr Papst Benedikt bim zitiere
Au dr Blocher duet sich in dr Tyrkei blamiere.
Bi de Fussballer hätte beidi, es duet ys selber au nerve,
Ghenne lehre, wie mit belanglose Flosggle ghasch um di werfe!
Die meischte blabbere scho so uniformiert
Dass es bald kei Mensch meh intressiert
Per Mail meldet dr Andrea M.: "I mach nym wytter!"
Fyr dr Christoph E. wird das Ganze uff eimol ganz schitter.
Denn find emol z'Basel e Mister Euro Null Acht,
Wenn jede weiss, dass es in dem Job ständig nur gracht.
Au wenn di friener hesch loh vo dr Uni formiere
Ghasch trotzdem nid per se als Mister Euro brilliere
Dr "Dschortsch-Dabbeljuu" hett vom Baker e Bricht ybergho
Er sell doch "please" vom Irak d'Finger loh!
Doch leider hett's de Ghäärli nid begriffe
Und loht trotzdem no meh Soldate nach Bagdad schiffe
So schlüpft au dr fetti John uss Alabama
In d'Uniform statt ins Pitschama
Dr Fritz maint zem Hans ganz prompt: "Doo kummi au!"
Zahlt 200 Stutz fyr die progglamierti grossi Schau.
Die zwai Riese hänn sich denn noni mol richtig verschlaage,
Verdryllt sich dr Ami s'Knei und liegt uff dr Schraage!
Piggfein glaidet statt in Uniform
Ärgeret sich dr Fritz am Schluss enorm!
Sie singe scheen, sie singe toll
E paar trallere wirgglig grauevoll.
Bi de Finne dänggt e menge: "Die spinne!"
Und doch hett's glänggt, um de Contest z'gwinne!
Denn trotz schrille Uniforme
Lyyge Lordi am Schluss ganz vorne.
Es gäbt wie immer no soo viel z'brichte,
Vo andere Lyt und komische Gschichte.
Doch Uniformiere hin oder her, mir mien jetz los,
Denn: D'Stroos gheert uns, das isch famos!
Mir wiensche allne fyr die scheenschte 3 Dääg:
Gniesset die Zyt und bliibet zwäg
Eiri Gassebrieder
Do no e "Werbeblogg" soz'sage in eigener Regie:
Unseri Zeedel sin gsponseret vom Berger Karlii
Dr Drugg verdangge mir emmene Oberbaselbieter
Es isch e Schwiizer und zwar dr Dieter