In dr Stadt wird allewyl nur traatscht yber d'FCB-Taate
Derbi ghunnt us dr Regio die allergreschti Sportgranate:
Dr Roger Federer gniesst uff internationalem Parkett
E Status, wie-n-en dr FCB grad emol national eppe hett.
"Alles Roger" liegt fyr uns als Sujet drum uff dr Hand
Mir zolle Tribut em beschte Sportler im Schwiizerland!
Es isch scho scheen, Roger, das miemmer do saage,
Wie Du gar Schwoobe ghasch uff em Platz ummejaage!
Und am Schluss, wenn au nid ganz ohni Not
Au no vernascht hesch de jungi Zypriot!
Alles Roger, in Melbourne g'winnsch mit sich'rer Hand
Jetz simmer uff d'Swiss Indoors in Basel g'spannt ...
Nach dr Sportlerwahl ghenne mir uns ghuum erhoole
Hett doch dä Deffli-Bueb em Roger dr Titel g'stohle!
Bi Waahle frogsch Di als scho: "Was yberlege die Lyt?"
Oder, Frau Saskia Frei, wie fiehle Sie sich hyt?
Alles Roger dänggt sich ebbe vorher scho, die Gritte,
Risst jetz e Lätsch und sait: "I mag nym wytterstritte!"
Hyroote isch unter prominente Persone
Anschienend wieder eppis, wo sich duet lohne.
Z'England zeehrt dr Charles vor dr Altar sini Camilla
Und im Dezämber stoht au dr Sir Elton (zu) si(m) Maa!
"Alles Roger, do bin i fyr eimol au derbi"
Dänggt de Wal und biegt ybermietig in d'Thämse yy!
Bi dr Abfahrt frogt dr Couchpin dr Merz ganz kurz:
"Arbeiten bis Sibzisch, wäre Dir das au schnuurz?"
Dr Blocher bremst und fluecht: "Sapperlotti!"
Scho macht d'Calmy-Rey e Schruube uff ihrem Trotti!
Alles Roger? Nid immer im Bundeshuus z'Bärn,
Denn jede plapperet fyr dr anderi ganz gärn
Uss em Tunnel kemme Lyt, uff de Gleis ghamme sitze
Kontrolleure verschengge Wasser statt Billet z'gnipse
G'schäftsliet mache sich per Taxi uff d'Sogge
Das alles nur, wyl e paar Tiebli uffere Fahrleitig hogge?!
Alles Roger hämmer dänggt bim Ziegli fahre
Nid dra dänggt, dass d'SBB bim Strom will spaare
Dr Gerhard Schreeder verlosst d'Berliner Metropole
Und verdufftet zem Gas nur wege dr Kohle!
In Ziiri deerf er ungeniert ins Ringier-Huus sitze
Um deerte no e paar Bleistift z'spitze!
"Alles Roger" verkiendet us Berlin derfyr d'Frau Merkel:
"Ändligg simmer dä Gerhard los, das Ferkel!"
"Torino 2006", mir sinn skeptisch gsi, hän nymi g'lache
Froge-nis: "Merkt epper, dass au Schwiizer mitmache?"
Doch denn soviel Gold bi de Fraue, s'isch kumm z'fasse
Und d'Schochs dien dr Sieger gar 'en famille' ussjasse!
Alles Roger, so'ne Medaillesääge macht Durscht!
Dass es in Sion hätti selle sy, isch jetze au Wurscht!
Apropos Durscht: Mir dien jetz do schliesse
Geehn lieber selber ein hinter d'Binse go giesse!
Hänn diesmol zwar d'Yakins und dr Bush verschont
Eppis z'brichte yber die, hätt sich eh nid g'lohnt!
Alles Roger wiensche mir fyr die scheenschte 3 Dääg,
Gniesset nonemol dr Schorsch und bliibed zwääg!
Euri Gassebrieder
Do no e "Werbeblogg" soz'sage in eigener Regie:
Unseri Zeedel sin gsponseret vom Berger Karlii
Dr Drugg verdangge mir emmene Oberbaselbieter
Es isch e Schwiizer und zwar dr Dieter