Im Muttenz Dorf hett me's scho vo wittem g'seh
Bisch quer duur d'Stadt gondlet bis ins Eglisee
Miteme G'söff in dr Hand winggsch uuse ganz stolz
Und riefsch fyyre: "Neggschte Halt bitte Bruderholz!"
Doch s'Haifisch-Drämmli gitt's nym sit em 19. August:
Im Depot hett's brennt, fyr alli Partyleuie e Rieseverlust!
Mr schwelge drum in Erinnerige und tanze als Flämmli
Hänn s'G'fiehl, mr hogge nonemol in dem tolle Drämmli
G'niesse die ysseri Ruute und verglemme ys s'Bleere
Uff unsere eigene Haifisch-Drämmli-Dernière!
Bisch g'stande an dr Theke, leersch grad e Bierli iine,
Hesch g'schnuurt yber die, wo stehn näb de Schiene:
In Paris - es isch sicher nid die feini Art
Brinzlet aine figgtif uff e Blocher-Blaghaat!
Bärn striicht Subventione, Pro Helvetia wird bleich.
Nur dr Blocher verzapft immer no ung'strooft sii Seich!
Wil als Bundesroot e Abstimmig nym sotsch boykottiere
Duet dr Blocher im Vorfeld aifach nym gross referiere!
E Iisproch dert, e Veto doo
Ziiri wird wohl kei neii Stadion ybergho.
Am Schluss sin jo doch alli ganz froh
Denn d'Ziircher bringe nid emol e Schänzli zem Stoh
Hoch und quer werde Reehrli montiert, es isch e Prach
Denn Schnee druff und hoppla:
scho isch alles zämmegracht!
Trotz Eminem und Springsteen isch es in d'Hoose
Beesi Hurricanes kenne ihn au nid in d'Wiesti bloose
Und au dr Fahreheidt-Film hett sys Ziel verfählt:
Dr "Tschortsch Dabbelju" isch doch wiederg'wählt!
E Trost gitt's no, er isch zwar nid gross:
In vier Joor simmer dä Bu(r)s(c)h ganz sicher los!
Im Dytsche pagge e paar "Promis" ihre Plunder
In England schigge sie wäg dr Quote e Buuse-Wunder
Fyr was die in Busch seggle, das isch doch klar:
"Hol mich hier raus, ich bin ein Star!"
Dr Franz sait zur Frau und siine Maidli:
"Statt in Dschunggel gemmer lieber ins Sahleweidli"
Dr Ulli pfifft, scho haut dr Felix nach Mynche ab
Bim VfB wird fyr dr Hakan pletzligg d'Luft ganz knap
Denn mit däm Matthias will's aifach nid klappe
Derfier hänn ihn d'Schugger nid grad kenne schnappe!
In Ischtanbul macht dr Haki, was er wirkligg sott kenne:
Kebab iineschiebe und emene Balle nocherenne!
Bim Denner goht schient's alles nur no "runter",
Dr Migros fabriziert Budget-Sache ganz munter
Und au dr Aldi grifft uff eimool im Schwiezer Märt yy
Drumm lanciert dr Coop uff eimool dr "Prix Garantie"
Dr Hotzeplotz meint: "Wenn die d'Pryyse so drugge
Lohnt's sich fyr mi bald nymme, eppis go z'mugge!"
Miesste mr nid no dr Alex erwähne?
Oder isch die Spuggaffäre nid langsam zem Gähne?
Sitte fielle kenntsch au mit Dopper:
Vom Ösi bis hi zum Irische Galopper!
Doch die scheenste 3 Dääg warte, mr dien do schliesse
Und d'Dernière im aigne Haifisch-Drämmli g'niesse!
Im däm Sinn: Proscht und allne fyyrige drey Dääg
Bisch nett zu de Flämmli, wenn sie triffsch uf em Wääg!!
Euri Gassebrieder
Do no e "Werbeblogg" soz'sage in eigener Regie:
Unseri Zeedel sin gsponseret vom Berger Karlii
Dr Drugg verdangge mir emmene Oberbaselbieter
Es isch e Schwiizer und zwar dr Dieter