Afrikanischi Hitzewälle z'Basel
Dr letschti Summer isch gsy e ganz spezielle
Vo uns het niemer meh Schaffe welle
Zwaiefierzig Grad im Schatte
Kai griens Greesli isch ybrigbliibe uff dr Matte!
Bi däre afrikanische Wärmi schwitzisch alles duure
Dr Lälli hangt uuse, hesch ständig e troggeni Schnuure!
Dr ganzi Daag blaue Himmel, e tolli Sach
Ghentisch lääbe innere Bambushütte, ganz ohni Dach
Und am Oobe simmer in Sandale und kurze Hoose uuse
Denn dehaime isch bim beste Wille nyt gsi mit pfuuse!
Dr Scheff vom Mad Max duet ys denne aa'ranze,
Bi dääne Deppe darfsch nur in voller Büxxe go tanze!
Andersch isch das gsy fyr Fraue
Natierligg nur bi dääne, wo sich au getraue!
"Damit mr nyt am Fuudi bliibt klääbe" meint's'Reesli
"Traag i dä Summer heegstens no e Tanga-Heesli"
Au bi mängem "Mechtegärn" hämmer ys d'Auge g'riibe
Yber das, wo die wäge dr Hitzewälle so alles hänn triibe
Do hät dr Haki bime Hoor franzeesisch aa bieffle
Scho wird er "retourniert", Pariser dien'en rieffle.
Denn statt Rundene drille und sich e weneli loh knätte
Isch dä Interviewkeenig lieber ins Spitel yyträtte!
Kuum Vater verliert er au dr Liebeskampf mit dr Frau
Kämpft er bim Quälix so wyter, saage au d'Schwööbli ihm glii wieder "Tschau!"
Sie wetze nach rächts, sie hächte nach linggs
Bachnass frooge sie sich: "Was bringt's?"
Letscht Summer in Wimbledon, kirzlig in Melbourne:
Keine hett e Chance bim Federer syne Return!
Während die neii Nummer 1 no kuum tuet schwitze
Lauft dr Saft bi de Gägner scho uss allne Ritze!
Bim Sunnebaade yberlegt sich e ex-Pirat
Ob er ab Winter nid soll schaffe fyr Privat!
Nach Tele "vieräzwänzg", wo scho isch bachab,
Macht Sat1 mit em Schawinski wohl au glii schlapp!
Die Schwiizer-Wälle macht eine scho nymmi mit:
Adiee und letschti Klappe fyr dr Harald Schmidt!
Im Guggikaste gheere mr vom Noldi in California,
Wo sait: "Schulde wäg, das miemer nimm haa".
Und d'Amis wähle, allne beese Bettgschichtli zem Trotz
Statt e dumme Studierte dä eestrichischi Muskelprotz!
Um sich bim Reede nid z'blamiere
Roote mr im Noldi, zwyscheduure au s'Hirni z'trainiere!
Im Summer uff dr fuule Hut glääge isch wohl d'CVP
Denn uff eimool isch ihr Ruthli niene meh!
Stattdesse, fyr Jungi isch es wie'ne schlächte Scherz
Regiere jetz dr Polderi Blocher und dr Grosspappe Merz
Wichtig isch nimmi gsy e meegligst ghurze Rogg,
sondern Alter yber sächzig, aber no lauffe ohni Stogg!
Mr kennte au no vom Stroom verzelle
Wo uff eimool nimmi bis Italie hett welle.
Oder vo dem Herr us de USA
Wo sälber scho menge Stromussfall hett gha!
Doch die scheenste 3 Daag warte, mr mien schliesse,
Sunsch ghenne mr dä letschti Summer nid emol wierdig begiesse!
Im däm Sinn: Proscht und allne hitzigi drey dääg
Machet au e Welle und bliibet derbi zwääg!!
Euri Gassebrieder