AU MIR GRYFFE NACH DE STÄÄRNE
Dr FC Basel spielt geege d'Schotte ganz prima
Qualifiziert sich bravourös fir d'Maischter-Liga
Au d'Beatles-Städter gwinne nit bi "Little Basle"
Und stehn uff em Raase wie begosseni Esel
Denn nach de Stäärne gryfft immer no
Em Chrigel sy Huffe mit Yakins und Co.
Vom Hakan heert me, er wurd sich bim Seggle meh als dr Muri engagiere
Und im Summer dr Gump ins Ussland riskiere
Mr hoffe nur, er fangt im Training nit aa gryyne
Wenn er merggt, es gitt kaini Gutzeli vo Mutti Ermine
Nach de Bazzeli, äxgiisi Stäärne, gross oder glai
Muess er uff jede Fall gryffe ganz elai.
Wottsch allerdings an e Match vo däm FCB
Dr Herr der Ringe oder Härry Potter im Kino gseh
Dernoo biessisch an de Kasse fir dys Kultur-Verlange
Mit Schaiche in Buuch stoo in lange Warteschlange
Willsch z'Basel nach Byyljee statt nach Stäärne länge
Bruuchsch Närve wie Drootseil und s'hilft kai Dränge
Lang aastoo, kurz duuregoo und dernoo nit schlauer
So goht's de Expo-Bsuecher, sie werde als grauer
Und dangg de famillief(r)yndligge Pryyse
Schiebt dr Gäldseggel bis z'Oobe e Mega-Gryyse
Hesch an däre Usstellig welle luege nach eme Stäärn
Hett dr Seggelmaischter jubiliert doobe in Bärn
Deert, mit Lächle iiber alli Bagge und blonde Strähne
Wiehlt s'Breitmuulfreschli uff die andere Drääne
Und maint ganz sälbstbewusst: "Moi, Calmy-Rey
Geh nur nasch Davos, wenn misch dr Colin will gseh!"
Sotti die Frau Bundesroot emol nach Stäärne gryffe
Sin's gääli uff blauem Grund, hesch es begriffe?
Wääred bi uns unverhofft, aber nid fir immer
Dr Ängel uff em Minster wohnt im Zimmer
Mien z'Ziiri 2 Dame jetz vo dusse iiber s'Wetter brichte
Und baue sich sälber Falle yy, bi ihrne stürmische Gschichte
Wenn sie stehn uff em Dach, d'Stäärne zum Gryffe no
Isch sicher, dr neggscht Verplapperer wird wieder gho
Im grosse Kanton do draie sie alli wieder emol duure
S'Michelle - mit Usschnitt bis zum Nabel - macht au e grummi Schnuure
Derwyl dr schryybendi Dieter, iiberhebligg, ganz glaar
Die greeschti Fraid hett bim ermittle vom Superstar
Sott dä Liebling yyschloo und nach de Stäärne gryffe
Steggt dr Bolan Euro in Sagg näbe syynere schyynts tolle Gitarre
Nääbem Federer in dr Halle und em FCB im Pargg
Spiele in dr neie Arena au d'Dragons ganz stargg
Dass sie sich aifacher an Uffstieg kenne mache
Doderfir het gsorgt e andere Drache
Sotte d'Dragons nach em Nati A-Stäärn gryffe
Isch's, will dr Tännler d'Fribourger het verpfiffe
Proscht und allne scheeni drey Dääg
Gryffet au nach de Stäärne und bliibet zwääg
d' Gassebrieder
(im Stäärne-Fieber)