kennt kai Grounding, denn au ohni
Milliardezuestupf und fliegel
Hebe mir ab!!
Sie isch gsi so scheen, sie isch gsi so toll,
Sie isch gflooge meischtens au ganz voll.
Doch "dangg" em Bruggisser sim Greesewahn
Fliegt "unsri" Swissair pletzligg uss dr Bahn!
S'Sammle vo Schrott-Airlines durch dä Philippo
Isch die finanzkräftigi Swissair uff s'Mol vil z'tiir ko.
Dere Meinig sin au d'Verwaltigsreet gsi, die Bajasse,
Und hänn dr Hunter-Strateg fristlos miesse schasse!
Fir e paar Daag iberneh duet's denn dr Moritz Suter,
Hett welle saniere, dä bald scho banggrotti Kutter.
Das hett aber iiberhaupt nyt kenne nitze,
Wil die uff em Balsbärg sich gäggesitig dien stitze
Und trotz Fählplanige und Sabena-Lieche
Witerhin fliessig ihri Stützli kenne iistrieche!
Doch d'Chefetage merkt nachenand denn gschwind:
"Die Kueh isch g'molgge, ich nimm dr Blind!?
Zur Rettig kunnt em Corti Mario scho glii dr Gedangge,
Alles z'verschutte, damit's wieder gitt e paar Frangge
Nur hett er die Sach nid ganz duurecheckt
Und s'erste Grounding vo dr Swissair isch perfekt!
D'Fluugi hänn niene mee uff Rechnig kenne tangge
Au wil s'versprochne Gäld no g'fählt hett vo de beide grosse Bangge!
Und um ganz abz'wände die Schand fir's ganzi Land
Butteret, oh Schreck, au no die öffentliggi Hand!
Au Anderi hänn no an Gäldbüttel und Närve g'naggt:
In Zug drait Eine duure, vellig beknaggt,
Im Gotthard raase zwai Brummi inenander iine,
Z'Ziiri landet e Flugi im Wald, es isch zem Griine!
Und jedes Mol, wie au am elfte Septämber,
Muess dr Leueberger aanestoh fir d'Färnsehsänder
Er dänggt: "Hoffentligg isch das emol wieder vorbi!"
So wie mir jetz au, drum luege mr emol, was isch passiert bi uns am Rhy!
Do isch dr FCB ändligg iizooge im St.Jakob-Park
Isch besser als dr Raase, jä, sie spiele richtig stark!
D'Regio hebt scho ab und träuimt, au die bi dr BaZ,
Vom'ene Riesefest am 8. Maie uff em Barfiesserplatz!
E Fest wird vermutligg au denn emol stiege,
Wenn das Grüppli gniegend Gäld hett iitriebe,
Wo d'Brugg zerscht iiber dr Rhy will baue,
Bevor sie neime im Dschungel kasch go bschaue!
S'Fasnachts-Comité losst bi de Clique e Bombe platze,
Verlangt fir d'Blaggede pletzligg e no greesere Batze!
Das tuet uns natierligg nid witters erstuune,
Wenn sie die erschti Serie dien im Bach "verruume"!
Groundings jetz au bi dä lokale Fernsehstatione:
Tamara & Co. schiene in Basel nid wirkligg z'lohne!
In Ziiri bim Schawinski kunnt's gar zum Supergau,
Dä wo meh schnurrt als syni Gäst gitt uff, sait ändligg "Tschau!"
In Leutschebach hett nur ein miesse dr Huet nee:
Dr Schellebärg ka dr Arena-Zampano nimmi gsee!
Nachdem dä Philippo, und das isch wirkligg nid chic,
Wohl z'fest zämmegspannt hett mit deene vom Blick.
Dört isch au z'Läse gsi vo dere neischte Airline-Panne.
Nei, kei Absturz, kei Grounding, eifach dr neui Name!
Trotzdem wiensche mir dr Swiss ohni Air
E guete Start, keini Prozess und im Umgang mit Geld diesmol mee Flair!
Proscht und allne e scheeni Fasnacht,
mit oder ohni
D' Gassebried-air