Rien ne va plus, les jeux sont fait
So wird's deene dereinst, ihr werdet's gseh
Basel soll, mir kenne's kuum glaube,
Grad zwai Casino-Lizenze bim Bund abstaube
An dr Mäss und am EuroAirport usse
Soll dr Rubel rolle, nid nur fir d'Russe
Uus dr selbsternannte Kulturstadt, das isch dr Bryys
Wird denn au no e mittelprächtigs Zoggerparadies!
Rien ne va plus hett's im Land vo de bikanntischte Casinos lang au g'haisse
D'Amis hänn nid gwisst, wäär dr Clinton uus em wysse Huus derf schmaisse
Es haisst: Mr zelle nooch!, denn leen sii's blyybe,
Die ganzi Wält hett sich wuchelang d'Auge g'ryybe
Dass so eppis passiere gha, das isch dr Lohn
Fir e Volgg vo Fast Food, Eminem und Sillicon.
Les jeux sont fait hett me g'maint bi dr Expo Schwyz
Und g'hofft, me kenni abheegle, de dyyri Witz
Derfiir stelle sie e Urner Grind aane
Wo die Uustellig aifach uff e Joor speeter duet blaane
Swisscom, Diax und Orange sin derwyyl abg'haue
Die hänn erliggt: Do kasch di Ruef nur no versaue.
Rien ne va plus kasch bim Coop nid saage
E neis Logo, s'Hochhuus renoviert, dä alti Laade
Denn e Superkäärtli doo, e Bonus-Rabättli deert
Hauptsach d'Lyt kaufe yy wie gschteert
Doo froogsch di allewyl, s'nämm aim Wunder
Ob die no eppis verdiene, bi all dem Plunder!
Les jeux sont fait haisst's derfiir bim Migros
Dä will nid uff Forderige fir mee Lohn yygoo !
Sälbst wenn du Gnägges hesch und no e Frau
Fillsch Regal uff , zwai Sprooche barlaare kasch au
Schufftisch, machsch, aber es blyybt luusig
De iberkunsch doch nid meer als dreituusig!
Rien ne va plus bim Basler Waaljoor-Knaller
Fir die yysigi Lady, hejo, d'Frau Schaller
Au sie hett nid mee Pulver welle ryybe
Drum hänn d'Stimmbiirger sie halt aafo schnyyde
Ob allerdings dr Neii mit dä Zeba-Lyt deert usse
Besser z'schlag kunnt, das isch no nid dusse!
Les jeux sont fait: d'Borer's blyybe doch Berliner
Und kömme sie uff Wysyte, denn nur als Schlyymer
Bi Thomi's ?Wetten, dass ...?? us Basel nämlig
Hänn sie viil verzapft, aber dasmool nur unverfänglig
Zem Gligg hett er d'Offerte vo dä Bängger grad abbloose
Sunsch wär s'Texas-Girl au no ummegrutscht uff unserne Hose
Rien ne va plus äntlig au im Container Ändi Joor
Bivor die drei Wyyber enander no rysse an de Hoor
Fir dr Höhepunggt im woorschte Sinn
sorgt juschtemänt no e Baslere deert dryyn
Bevor denn die Gumsle gwinnt, s'isch zem Gähne
Wo vergosse hett am maischte Drääne
Les jeux sont fait bald au im Joggeli-Park
Ä ganzi Stadt findet das Stadion saggstark
D?Byyllee wärde bstellt wie lätz iiber Internet
Bis es nach zwelf Stunde kaini mee hett
Mir hoffe nur, und das wär nadyderlig toll
Dr FCB braichi denn als au so schnell ins Gool
Rien ne va plus, les Sprüch sont fait
S'isch heggschti Zyt, ohjemine
Zwar wäre mir parat und warte druff
Dass die Casino äntlig mache uff
Doch vorher gniesse mir no, das isch woor
Die scheenschte drey Dääg vom Bebbi-Joor
Proscht und allne e scheeni Fasnacht
d'Gassebrieder