Im letschte Joor, s'isch gsi no im August
Verspiiere ä huffe Lyt ä ganz riesigi Lust
D'Techno-Fans vo iiberall sin koo in Gnuss
Vo dr Mega-Party mit em Name "NAUTILUS".
Hesch glääse, was uff sällne Blakaat do stoht
Weisch allerdings nit graad, um was es goot.
Eppe glyych isch's em arme Beamte au gange
Wo die Dätschmeischter sin go s'Okay verlange!
Do het sälle allwääg gmaint, er wuurdi zuestimme
Ere Poolparty, wo e baar Jungi dien Liedli singe
Und het denn eerscht spööter miese tschegge
Was hinter sällere Fete so alles duet stegge.
Dr Stöffel, dä Partyhängscht vom Spaalebuggel 6
Gheert am Radio dervoo, und isch pherbläx
Nullkommabletzlig het er nämli gschnallt :
Do gääb's ä Feez mit Stimmig, ganz geballt!
Iibers Händy, wie keent's hittigsdaags au so sy,
Froogt äär syyni Muus: Gäll, do simmer au derbyy.
"Im Joggelibaad, bi sällem Riesefescht,
Mit Dancefloors, DJ's, numme s'bescht!"
Im Vorverkauf äär sich den Byyljee organisiert
Damit er bim Yytritt kai Zyt verliert!
Aigentligg het äär ganz richtig dänggt
Und wie'ne Trophäe syyni Byyljee gschwänggt.
Dr Uffbau het aagfange am Frytig ganz bizyte
D'Badegäscht flichte als wie mee uff d'Syte
Und protestiere, me maag das verstoo
Zletschtamänd sin sie nit ummesuscht yynekoo!
Phünggtligg stoot alles baraad, im Gaartebaad.
Do tiigeret denn unser Bäärli a sällem Daag
Richtig Yygang; doch scho gitt's die erschti Krise:
Trotz Byyljee duet me 'ne dr Zuetritt vermiese.
Strängi Kontrolle, das isch guet und rächt,
Nur finde sie das nit ganz gerächt:
"Iiber e Stund hämmer miese do usse stoo,
bis me yys äntligg doch no het yynegloo!"
Kuum dinne, isch d'Poscht voll abgange
Und duet Glugger und Leffel alles abverlange:
Lutti Muusig, schrilli Liechter und schreegi Dype
Dien um die siibe Biinine ummeflippe.
Nach 2,3 Schuumwaaie sot denn unsere Stöffel
Eppis abbringe, doch statt wieder aastoo, dä Löffel,
Schliecht äär sich ganz ohni vyyl Grysch
Fir sy Gschäftli zem neggschte Gebysch.
Ihr Besoin isch vyylne so abhandekoo,
Was Badegäscht am Sunntig nit hän könne verstoo!
"Denn feerchterlig gsaichelet het's vom Urin!"
brichtet haarig im Basilisk d'Frau Rasputin.
Fir die Durschtige wird wyters ussgchänggt
S'People zur Muusig als wie mee d'Glängg verränggt!
Do passiert au dusse vor em Joggelibaad allerhand
Mit dä Basler Schugger und hoche Lyt us em Baselland!
Denn d'Biirger vo Muttez und au vo Minggestai
Hän nach Mitternacht dä Lärm nimmi ussghalte dehai
Si dien drum ihri Gmeinirööt glatt yyschallte
Zem go luege, " ... was do los isch, bi dääne duureknallte!"
Sie hän sich denn aagnoo, dääre Problematigg
Sy zäme mit dä Schugger go protestiere ganz artig.
"Die Muusig isch z'lut, unseri Lyt finde's ä Sauerei!",
Und scho isch's e weneli lyysliger gworde, so geege die Drei.
Zu sällere Zyt hän dr Stöffel und syy Germane-Gritte
Scho langsam Lämpe, jä, si sin bäumig am stritte.
Sie het langsam d'Nase voll vo dääre Riesesause
Und sait: "Komm Junge, wir gehn jetzt nach Hause!"
Am Ussgang werde si no iberhyft mit Wärbepapierli
Wo druffe stoot, was sunscht no so lauft mit und ohni Tierli
Doch will dä Mischt nit wotsch mithaime schleppe
Verreise die Zeedel am Boode, vo all dääne Deppe!
Zäme mit Plastigg-Becher, Bierbiggse und Serviette
Und was d'Bsuecher sunsch no duur d'Luft leen tschette
Liegt dä Giggernillis iiberaal verstreut ummenand
S'het ussgseh rund ums Joggeli, s'isch gsi ä Schand!
Drum wette mir zum Schluss do saage:
So Lumpede sin toll, do wämmer nid glaage!
Doch sott me bi dr Organisation bitte dra dängge
Sich geegesytig mee Achtig doch z'schängge!
Fir die scheenschte drei dääg wintsche mir bigoscht
Viel Spass, Sunneschyn und saage allne Prost!
d'Gassebrieder