UND FALLT'S AU WÄG, DAS
'WETTEN, DASS ...?
MIR HÄNN IN DR JOGGELI-HALLE
ALLEWIL NO EYSE SPASS !!
D'Joggeli-Halle, die Betonhütte zu Basel
Gheert me uus Dytschland, s'isch ghai Gfaasel
Sigg fyr dr Wetten, dass ...?-Thomi, dä Mega-Blapperschnabel
Mangels Komfort fyr die näggschte Joore nym aggzeptabel
Wetten, dass isch nid dr ainzig Grund
Wieso dä Kruuselkopf nym uff Basel ghunnt?
Aber au ohni die Fernseh-Crew isch e Jeerli ummegange
Ohni dass lang hesch miesse blange
Allerhand isch gloffe, noch und necher
Und s'Volgg isch gschtreemt, uus allne Lecher
Wetten, dass bis zum näggschte Moorgestraich
Wieder meh Gescht gheeme vo ähne am Daich?
Andere, dene spielt s'Ambiente doch au e grossi Rolle
Dert ghemme den au d'Stars ganz ohni z'grolle
Mr maine die viile männligge Tennis-Profi
Wo allerhand Lyt alogge, vom Direggter bis zum Goofi
Wetten, dass die halt au nur uff Basel streeme
Wil dr Brennwald se so guet duet entleehne?
Ney verbi gho isch e ganz spezielle Tross
Mit viile Teffli fyr's spektakuläre Super-Cross
Wenn dr Thomi gseh hätt, was die alles hänn miese selber uffbaue
Denn zuggt er zämme und grieggt drbi s'naggti Graue!
Wetten, dass menge Gast no nach Benzin gschmeggt hett
Wo'ner dähai isch g'juggt in sys weiche Bett?
Sie dribble, schiesse und dien yber's ganzi Feld ummewetze
Hejo, bi däm Halle-Masters vo dä Tschütteler doo fliege d'Fätze
Nur s'Publiggum hett das nid ganz verstande
Hänn sich versteckt in dr Beiz statt zuegluggt an dr Bande
Wetten, dass die noo lenger im Halletempel bliebe wäre
wenn dr FCB bis am Schluss um dr Sieg hät gheene mitghääre?
Und wieder hänn d'Schwoobe regglamiert, ganz grausig
An dere Iishogghei-WM z'Basel,
das sigg gar lausig:
Da spiele unsere Stars, es ischt zum Abwinke,
Aber hinterher gibt's kai Zelt, um sich rischtig z'bedrinke!?
Wetten, dass hätt die Aagfrässene au nid gross uffgmeeblet
und nach em dritte Feldschleesli hätte sie nur dumm peeblet
Unseri Iisgnosse dergege, es isch nid oft
spiele sich in Vordergrund, ganz unverhofft.
Druff abe hett's e Fescht geh, in däre Halle
Nach em Sieg gege d'Russe, dass es bis Muttenz hesch gheere schalle!
Wetten, dass passiert nid mit em EHC
Denn dä Drache schafft's doch nie in d'Nati B
Uffe, aabe, d'Ärm schwinge immer hin und her
ganz elastisch, als wär er e riesige Gummibär
Die junge Maidli griene, geen K.O,
das isch doch logo
denn hytte tanzt in dere tolle Joggeli-Halle
dr DJ Bobo
Wetten, dass bi däre Rägebooge-Party
ghai Sänger wirdsch finde
wo sich nid wird verloo uff d'Muusig
ab dem Bändli hinde
Ihr gseehnt, es git halt ghai bessere Ort
Fyr Unterhaltig, Kultur und vor allem Sport.
Drum heeret uff, no lenger z'hiele
Wil Wetten, dass...? nym z'Basel will verwyle
Wetten, dass mir's hänn viel glätter
ohni die Bandi vo Fernseh-Wetter?
Proscht und e scheeni Fasnacht
d'Gassebrieder